સ્નેહગીતા
પદ ૯
રાગ મેવાડી (‘મુખડાની માયા લાગી રે મોહન તારા’ એના જેવો ઢાળ)
વાલીડો વિજોગી ગયા રે, હો ઉદ્ધવજી અમને ।
વિસામો વિજોગી ગયા રે; હો ઉદ્ધવજી꠶ ટેક.
અમને કરી અનાથ, નેક નાખી ગયા નાથ ।
હવે કેમ આવે હાથ, કુબજ્યાના નાથ થયા રે; હો ઉદ્ધવજી꠶ ॥૧॥
પિયુ સંગે પળેપળ, કોયે નવ પડી કળ1 ।
અંતરે આવે છે વળ, દેખો દૂર રહ્યા રે; હો ઉદ્ધવજી꠶ ॥૨॥
કો’ને અમે કરું કેમ, અલબેલે કર્યું એમ ।
અંતર જળે છે જેમ, ડુંગર દાઝિયા રે; હો ઉદ્ધવજી꠶ ॥૩॥
નિષ્કુળાનંદનો નાથ, અમારી એ મિરાંથ હાથ ।
વિસારી વ્રજનો સાથ, દિલમાં નાણી દયા રે; હો ઉદ્ધવજી꠶ ॥૪॥ પદ ॥૯॥