સારસિદ્ધિ
કડવું - ૨
રાગ: ધન્યાશ્રી
પ્રભુ પ્રસન્ન કરવા કરે છે ઉપાયજી, જૂજવા જૂજવા આ જગમાંયજી ।
જેવી રુચિ જનની જેવો અભિપ્રાયજી, તે વિના બીજું કરે નહિ કાંયજી ॥૧॥
રાગ: ઢાળ
કરે નહિ બીજું કોઈ દિન, કરે તેમ માન્યું જેમ મન ।
મતિ ન પો’તી વૈરાગ્ય વિના, વણ સમઝે આદરે સાધન ॥૨॥
કોઈ કહે જપે હરિ રીઝશે, કોઈ કહે તપે તતકાળ ।
કોઈ કહે તર્ત તીર્થથી, રાજી થાશે દીનદયાળ ॥૩॥
કોઈ કહે જોગ જગ્ન કરતાં, પ્રસન્ન થાશે પરબ્રહ્મ ।
કોઈ કહે વ્રત નિયમ રાખતાં, શ્રીહરિ થાશે સુગમ ॥૪॥
કોઈ કહે કરવત લીધે,1 સિધે કમળ પૂજાથી2 કામ ।
કોઈ કહે પા’ડ ચઢી પડતાં, રાજી થાય શ્રીહરિ શ્યામ ॥૫॥
કોઈ કહે હિમાળે હાડ ગાળે,3 બાળે દાવાનળે દેહ ।
તો જરૂર રાજી થાશે જીવન, એહ વાતમાં નથી સંદેહ ॥૬॥
કોઈ કહે ધન ત્રિયા ત્યાગે, ત્યાગે ઘર કરે વનવાસ ।
કોઈ કહે વેષ કેશ વધાર્યે, કોઈ કહે ફર્યે ઉદાસ ॥
કોઈ કહે દિગંબર અન્ન અલૂણે,4 કોઈ કહે ફળ દળ જળપાન ।
કોઈ કહે પય5 પવન પીતાં, કેમ રાજી ન થાય ભગવાન ॥૮॥
કોઈ કહે મુખે મુન્ય ગ્રહિયે, રહિયે અણવાણ6 અહોનિશ ।
કોઈ કહે પંચ અગનિ7 તાપી, રાજી કરિયે જગદીશ ॥૯॥
એહ વિના અનેક ઉપાયે, રાજી કરવા ઇચ્છે છે રામ ।
નિષ્કુળાનંદ એ ભક્ત ભલા, પણ નકી નથી નિષ્કામ ॥૧૦॥