ભક્તિનિધિ

કડવું – ૩૮

રાગ: ધન્યાશ્રી

પ્રસન્ન કર્યા જેણે પરબ્રહ્મજી, તેને કોઈ વાત ન રહી અગમજી ।

સર્વે લોક ધામ થયાં સુગમજી,1 એમ કહે છે આગમ નિગમજી ॥૧॥

રાગ: ઢાળ

આગમ નિગમે એમ કહ્યું, રહ્યું નહિ કરવું એને કાંઈ ।

સર્વે સુખની સંપતિ, આવિ રહી એના ઉરમાંઈ ॥૨॥

સર્વે પાર જે પ્રાપતિ, સર્વેને સરે2 જેહ સુખ ।

તે પામે છે ભક્ત પ્રભુતણા, ઘણું ઘણું શું કહીએ મુખ ॥૩॥

સર્વે ઉપર જે શિરોમણી, સર્વે મસ્તક પર જે મોડ3

સહુથી એ સરસ થયા, કોણ કહિયે જાણો એની જોડ ॥૪॥

સર્વે કમાણીને સરે કમાણી, સર્વે ખાટ્યને સરે ખાટ્ય ।

તેહ પામી પૂરણ થયા, તે તો ભક્તિ કરી તેહ માટ્ય ॥૫॥

સર્વે કળશ પર કળશ ચઢ્યો, સર્વે જીત પર થઈ જીત ।

સર્વે સારનું સાર પામિયા, જેને થઈ પ્રભુ સાથે પ્રીત ॥૬॥

જેમ મોટા રાજાની રાજનિધિ,4 તે લડ્યે લેશ લેવાય નઈ ।

પણ જનમી એ જનક5 કર્યો. ત્યારે સર્વે સંપત્તિ એની થઈ ॥૭॥

તેમ સેવક સુત શ્રીહરિતણા, મણા એને કોઈ વાતની નથી ।

પૂરણ પદની છે પ્રાપતિ, અતિશય શું કહિયે કથી ॥૮॥

જેમ અતિ ઉંચો અંબરે ચઢે, આકાશે વસે જ્યાં અનળ6

એથી ઊંચો તો એક શૂન્ય છે, બીજાં હેઠાં રહ્યાં સકળ ॥૯॥

તેમ ભક્તિ થકી આ બ્રહ્માંડમાં, નથી સરસ જોયું શોધીને ।

નિષ્કુળાનંદ પદ પરમ પામ્યા, જે અગમ છે મન બુદ્ધિને ॥૧૦॥

કડવું 🏠 home