સારસિદ્ધિ
કડવું - ર૬
ધર્મ રાખે તેહ ધર્મી કા’વેજી, ધર્મ વિના જેને બીજું ન ભાવેજી
સુતાં બેઠાં ગુણ ધર્મના ગાવેજી, ધર્મ વિના બીજુ નજરે નાવેજી
ના’વે બીજું કાંઈ નજરે, ધર્મ વિના વળી કોઈ ધન ॥
ધર્મ ગયે જે ધન મળે, તે જાણો થયું વિઘન ॥૨॥
ધર્મ ગયે ધરા ધામ મળે, ધર્મ ગયે મળે સુત વામ1 ॥
ધર્મ ગયે ખાન પાન મળે, તે કરવું સર્વે હરામ ॥૩॥
ધર્મ ગયે સુખ સંપત્તિ મળે, ધર્મ ગયે મળે રાજપાટ ॥
ધર્મ ગયે મોટપ્ય મળી, બળી વળી સઈ થઈ ખાટ2 ॥૪॥
ધર્મ ગયે વસ્ત્ર મળે, આસન ને વાહન વળી ॥
ધર્મ ગયે સનમાન મળે, એહ આદિ સર્વે જાજો બળી ॥૫॥
ધર્મ ગયે જો તન રહે, તો તનને પણ ત્યાગવું ॥
જીવવાનું જાતું કરીને, હરિ પાસે મરવાનું માગવું ॥૬॥
ધર્મ ગયે સર્વે ગયું, ગયું નીર વળી નાકતણું3 ॥
માટે મૂકી નિજ ધર્મને, ન કરવું મુખ લજામણું ॥૭॥
ધર્મ વિના સુર અસુર નરનાં, સર્વેનાં શાહીસમ4 મુખ થયાં ॥
ધર્મ વિના ધરા અંબર માંહી, મોટપ માન કેનાં રહ્યાં? ॥૮॥
ધર્મ વિનાનું ધિક જીવવું, જન જાણજો જગમાંઈ ॥
દેવ ઇચ્છિત દેહ આવિયો, પણ કામ ન આવિયો કાંઈ ॥૯॥
ધર્મવાળા પર ધર્મના સુત,
રે’છે રાજી રળિયાત ॥
નિષ્કુળાનંદ ધર્મવાનની, શું કહિયે વર્ણવી વાત ॥૧૦॥