સારસિદ્ધિ
પદ - ૯
રાગ - ધોળ
સંત વિના સાચી કોણ કહે, સારા સુખની વાત;
દયા રહી છે જેના દલમાં, નથી ઘટમાં ઘાત... સંત ॥૧॥
જેમ જનનીને હૈયે હેત છે, સદા સુતને સાથ;
અરોગી કરવા અર્ભકને,1 પાયે કડવેરા કવાથ2... સંત ॥૨॥
જેમ ભમરી ભરે ભારે ચટકો, પલટાવા ઇયળનું અંગ;
તેમ સંત વચન કટુ કહે, આપવા આપનો રંગ... સંત ॥૩॥
જાણો સંત સગાં છે સહુનાં, જીવ જરૂર જાણ;
નિષ્કુળાનંદ નિર્ભય કરે, આપે પદ નિરવાણ... સંત ॥૪॥
કડવું - ૩૭
નિર્વાણ પદમાં પોં’ચાડે સંતજી, જે કોઈ દિલના દયાળુ અત્યંતજી
જેને એક ઉર રહિયા ભગવંતજી, તેણે કરી સદાય છે શુભ બુદ્ધિવંતજી
શુભ બુદ્ધિવાળા સંત જેહ, તેહ સહુના સુખદાય છે ॥
તેથી દુઃખ ન ઊપજે, જે સુરતરુ3 સમ કે’વાય છે ॥૨॥
જેમ વિટપ4 બહુ પરમારથી, પરમારથી પાથ5 ને પૃથવી ॥
ઘન પવન પરમારથી, તેમ પરમારથી રાકેશ6 રવિ ॥૩॥
જેમ તરુ સુખદાયી તેહથી, ફૂલ ફળ દળ શાખા મળે ॥
વળી શીતળ કરે છાયા વડે, તેમ સર્વે સંકટ સંતથી ટળે ॥૪॥
જેમ જળ મળ હરે જનના, વળી પાન કર્યે હરે પ્યાસ ॥
તેમ સંત સુખ સહુને કરે, વળી હરે તન મન ત્રાસ ॥૫॥
જેમ ભૂમિ પરમારથી ભણિયે, ઠામ ધામ ધાતુ આવે કામ ॥
તેમ સંત પરમારથી સમજો, સર્વે પ્રાણીના છે સુખધામ ॥૬॥
જેમ મેઘ જિવાડે છે મેદિની,7 જેમ અર્ક કરે છે ઉજાસ8 ॥
જેમ શશી કરે છે શીતળતા, તેમ સંત સહુના સુખનિવાસ ॥૭॥
જેમ પંચ ભૂતના પદાર્થથી, સર્વે સુખી રહે છે સંસાર ॥
તેમ સંત અલૌકિક સુખના, જાણી લિયો જરૂર આપનાર ॥૮॥
સાચા સંતથી સરી ગયાં, કૈક જીવોનાં કાજ ॥
એવા સંતને સેવવા, અવસર આવિયો છે આજ ॥૯॥
જો મનાય તો મને માનજો, છે અતિ અર્થની વાત ॥
નિષ્કુળાનંદ નકી કહે, સુખ થાવાની એ સાક્ષાત ॥૧૦॥