સારસિદ્ધિ
પદ – ૧
રાગ: રામગ્રી
નિર્ભય ચરણ છે નાથનાં, સેવો શ્રદ્ધાએ સંત ।
અવર1 ઉપાય અળગા કરી, સમજો સાર સિદ્ધાંત... નિર્ભય૦ ॥૧॥
સુણી સુખ લોકાલોકનાં, શીદ કરો છો શોચ ।
એ તો ઉદંબરે2 ફળ વળગ્યાં, થડ થકી તે ટોચ... નિર્ભય૦ ॥૨॥
એમ વળગ્યાં વિષય પાંચમાં, નર સુર અજ ઈશ ।
અધિક ન્યૂન એમાં નથી, રવિ શશી સુરેશ... નિર્ભય૦ ॥૩॥
માટે ઊંડું વિચારી અંતરે, ખરી કરવી ખોળ્ય ।
નિષ્કુળાનંદ પ્રભુપદ પખી, જ્યાં જ્યાં જાય ત્યાં રોળ3... નિર્ભય૦ ॥૪॥
કડવું - ૫
રાગ: ધન્યાશ્રી
એ તો કેને અંતરે નથી વૈરાગ્યજી, જેણે કરી થાય તનસુખ ત્યાગજી ।
એક હરિચરણે હોય અનુરાગજી, એવા તો કોઈક સંત સુભાગજી ॥૧॥
રાગ: ઢાળ
સંત સુભાગી સરસ સહુથી, જેના અંતરમાં નિરવેદ4 ।
સુણી સુખ સર્વે લોકનાં, જેનું નથી પામતું મન ખેદ5 ॥૨॥
ઊંડું વિચારી અંતરમાં, જોઈ લીધું જીવમાં જરૂર ।
વિષય સારુ સહુ વલખાં, કરે છે સુર અસુર ॥૩॥
વૈરાગ્ય વિના વિષય સુખનો, તર્છટ6 ન થાયે ત્યાગ ।
ત્રોડી પાડે પિંડ બ્રહ્માંડથી, એવો તો એક વૈરાગ્ય ॥૪॥
વૈરાગ્યવાન વિલસે નહિ, માયિક સુખની માંઈ ।
શૂન્ય સુમન7 સમ સમજી, ગંધ સુગંધ ન માને કાંઈ ॥૫॥
જે નિર્વેદ નિધિ8 નરનું, જેવું કરી દિયે છે કામ ।
તેવું ન થાય કહું કોઈથી, શું લખું ઘણાનાં નામ ॥૬॥
જેમ મળે એક ચિંતામણિ, ઘણી અગણિત વસ્તુનું ઘર ।
તેમ શુદ્ધ વૈરાગ્ય શિરોમણી, નથી એથી બીજું કાંઈ પર ॥૭॥
સર્વે સુખની સંપત્તિ, વસી રહી વૈરાગ્યમાંઈ ।
મોટે ભાગ્યે જો આવી મળે, તો ન રહે કસર કાંઈ ॥૮॥
વૈરાગ્યવાનને વિપત શાની, જે સમજ્યા સાર અસાર ।
જેમ તુંબું9 બોળે કોઈ તોયમાં,10 પણ નીસરી જાયે નીર બા’ર ॥૯॥
વૈરાગ્ય વિના તો વાત ન બને, શુદ્ધ સાચું ન લેવાય સુખ ।
નિષ્કુળાનંદ નિરવેદ વિના, આદિ અંતે મધ્યે દુઃખ ॥૧૦॥