કીર્તન મુક્તાવલી
હરિનો મારગ છે શૂરાનો નહિ કાયરનું કામ જોને
૧-૫૬૦: પ્રીતમદાસ
Category: ઉપદેશનાં પદો
હરિનો મારગ છે શૂરાનો, નહિ કાયરનું કામ જોને,
પરથમ પે’લું મસ્તક મૂકી, વરતી લેવું નામ જોને꠶ ટેક
સુત વિત્ત દારા શીશ સમરપે, તે પામે રસ પીવા જોને,
સિંધુ મધ્યે મોતી લેવા, માંહી પડ્યા મરજીવા જોને꠶ ૧
મરણ આગળે તે ભરે મૂઠી, દિલની દુગ્ધા વાળે જોને,
તીરે ઊભા જુએ તમાશા, તે કોડી નવ પામે જોને꠶ ૨
પ્રેમપંથ પાવકની જવાળા, ભાળી પાછા ભાગે જોને,
માંહી પડ્યા તે મહાસુખ માણે, દેખણહારા દાઝે જોને꠶ ૩
માથા સાટે સોંઘી વસ્તુ, સાંપડવી નહિ સહેલ જોને,
મહાપદ પામ્યા તે મરજીવા, મૂકી મનનો મેલ જોને꠶ ૪
રામ અમલમાં રાતા માતા, પૂરા પ્રેમી પરખે જોને,
પ્રીતમના સ્વામીની લીલા, તે રજની દિન નીરખે જોને꠶ ૫
Harino mārag chhe shūrāno nahi kāyarnu kām jone
1-560: Pritamdas
Category: Updeshna Pad
Harino mārag chhe shūrāno, nahi kāyarnu kām jone,
Paratham pe’lu mastak mūkī, varatī levu nām jone° ṭek
Sut vitta dārā shīsh samarpe, te pāme ras pīvā jone,
Sindhu madhye motī levā, māhī paḍyā marjīvā jone° 1
Maraṇ āgaḷe te bhare mūṭhī, dilanī dugdhā vāḷe jone,
Tīre ūbhā jue tamāshā, te koḍī nav pāme jone° 2
Prempantha pāvaknī javāḷā, bhāḷī pāchhā bhāge jone,
Māhī paḍyā te mahāsukh māṇe, dekhaṇhārā dāze jone° 3
Māthā sāṭe songhī vastu, sāmpaḍavī nahi sahel jone,
Mahāpad pāmyā te marjīvā, mūkī manno mel jone° 4
Rām amalmā rātā mātā, pūrā premī parakhe jone,
Prītamnā Swāmīnī līlā, te Rajnī din nīrakhe jone° 5