Aksharabrahmadhārā

 

Mangalam

Guṇātītam guruam prāpya brahma rūpam nijātmanah;

Vibhāvya dāsabhāvena Swāminārāyaṇam bhaje. 56

Brāhmī sthitiryatah siddhyet prākaṭyam parabrahmaṇah;

Brahmā’kṣharam gurum vande sākṣhāt siddhāntarūpiṇam. 57

Akṣharabrahma-vivaraṇa-pratijnyā

Swāminārāyaṇetyatra svāmi-shabden bodhitam;

Brahmā’kṣharam pareshā’nyasarvā’dhipatvahetunā. 58

Savistaram tadeveh sapramāṇam nirūpyate;

Yadvijnyānād vijānīyāt tatparam puruṣhottamam. 59

Parabrahmaṇā’kṣharabrahmodghoṣhah

Vedavedānta-shāstreṣhu prachchhannam gūḍhamakṣharam;

Prathamamujjughoṣhā’tra Swāminārāyaṇo bhuvi. 60

Swayamakṣharabrahmaṇā’kṣharabrahmodghoṣhah

Svīyopadeshavārtāsu guṇātītena brahmaṇā;

Swarūpam swayamevoktam tasmād brahma pramāṇitam. 61

Brahmajnyānasyā’’vashyakatā

Paropāsana-siddhyartham brahmabhāvā’’ptaye tathā;

Nirvighna-bhakti-sampattyai brahmajnyānamapekṣhitam. 62

Akṣharabrahmetishabdayoh vyutpattilabhyo’rthah

Ashdhātorvyāpanārthāddhi nanpūrvātkṣharatestathā;

Vyutpanno’kṣharashabdo’yam brahmaṇyeva prayujyate. 63

Sarva-jīveshvarebhyashcha māyātanmuktatastathā;

Bṛuhattvād bṛunhaṇatvāchcha brahmetyakṣharamuchyate. 64

Tatparah paramātmā’sti parabrahmeti shabditah;

Shabda-samayamāshritya mukhyārtha upavarṇitah. 65

Shāstreṣhu akṣharabrahmetishabdayoh upādānam

Kvachid brahmā’kṣharam kvā’pi kvachit tadubhayam saha;

Vedaishcha vaidikaishchaiva shrāvitam smāritam bhṛusham. 66

Akṣharabrahma-lakṣhaṇam

Parasmād brahmaṇo bhinnam tadekādhīnatāyutam;

Nityamekam guṇātītam māyādhipam cha chetanam. 67

Shreyo’nantaguṇairyuktam māyādoṣhavivarjitam;

Bṛuhattvāt saguṇam proktam sūkṣhmatvānnirguṇam tathā. 68

Upādānam nimittam cha taddhi sarjana-kāraṇam;

Ādhāro vyāpakam sṛuṣhṭerantaryāmi niyāmakam. 69

(Muṇḍake) Akṣharam na puruṣha-visheṣhaṇamiti pratipādanam

Akṣharam na param brahma parā yayetyupakrame;

Akṣharam puruṣham hyatra na puruṣha-visheṣhaṇam. 70

Tatraiva shravaṇādagre hyakṣharāt paratah parah;

Ato’kṣharam tu brahmaiva tatparah puruṣhottamah. 71

Prashnopaniṣhadukta-brahma-shabda-vimarshah

Parā’paretibhedokterjnyāyete brahmaṇī hyubhe;

Vibhātah panchame prashne hyakṣharapuruṣhottamau. 72

Gītoktākṣharabrahmashabdā’rthanirṇayah

Prārthitamaṣhṭamā’’rambhe kim tad brahmeti bhāvatah;

Tatrottare’kṣharam proktam param jīveshvarāditah. 73

Ṣhaṣhṭhyā sfuṭam pṛuthagbhāvo mama dhāmeti vākyatah;

Paramā’kṣhara-vāchyatvam naiva syāt parabrahmaṇah. 74

Anyathā sangatirna syāt panchadashavirodhatah;

Uttama-puruṣhā’nyatvam na sidhyet paramātmanah. 75

Brahmaṇo hi pratiṣhṭhāhamityādi sangatam bhavet;

Nā’to jīvasamaṣhṭyākhyam naiva muktātmavāchakam. 76

Atah parātmabhinnebhyah sarvebhyo yat param sadā;

Tadevā’kṣharavāchyam syād aṣhṭame kṛuṣhṇabhāṣhaṇe. 77

Panchadashe’pi muktānām jīveshvarātmanām tathā;

Graho nā’kṣhara-shabdena kṣhare’ntarbhavanādiha. 78

Akṣharatvam tu nityam hi nirābādhamapekṣhitam;

Muktānāmapyachidyogāt pūrvamatah kṣharatvadhīh. 79

Nityamukto’pi nāstīti sarve kṣharatvabhājinah;

Evam gītāsu jānīyād akṣharabrahma-yojanām. 80

Athāto brahmajijnyāsetyatra brahmapadā’rthah

Shrutibhih shrāvite bhūri smṛutibhih smārite bhṛusham;

Brahmasūtra-pratijnyāne jijnyāsite tu brahmaṇī. 81

Kaṭhopaniṣhatsthā’vyaktashabdā’rthanirṇayah

Avyaktam na pradhānam syāchchharīram na mahatparam;

Rūpakādeshcha gītokteh kaṭhe hyavyaktamakṣharam. 82

Brahma-parabrahma-sambandhah

Upāsyopāsakatvam syāt sambandho dāsabhāvatah;

Param brahma sadopāsyam akṣharam tadupāsakam. 83

Ahikuṇḍalavattvam na tejastejasvitā nahi;

Akṣharam dāsabhāvena nityam sevāsamarpitam. 84

Jīvānāmīshvarāṇām cha muktānām dāsabhāvatah;

Brahmaṇah sa visheṣhah syād nityam tasya niranjanāt. 85

Setūnmānādihetubhyo bhinnah paro’kṣharāddharih;

Swarūpaishcha swabhāvaishcha guṇaishvaryāditastathā. 86

Akṣharabrahmaṇashchaturvidhatā

Chaturdhā’vasthitirjnyeyā kāryabhedānna tattvatah;

Muktisṛuṣhṭilayādyartham ekasyaivā’kṣharasya tu. 87

Chidākāshastathā deshastaddeshasthashcha sevakah;

Gururbrahmaswarūpashcha chatasro brahmaṇo vidhāh. 88

Ādyatrayam sadaivaikam gururūpam cha bahvapi;

Iti sankhyāviveko’yam vijnyeyo brahmavedane. 89

Chidākāsharūpamakṣharam brahma

Chhāndogye daharā’’kāshash-chidākāshah prakīrtitah;

Sakalahṛudguhāvartī yadantah puruṣhottamah. 90

Na chā’yam bhautikā’’kāshastajjanma shrūyate yatah;

Nā’’tmā’pi prakṛutastatra naiva parātma-sambhavah. 91

Dahare hyupadiṣhṭā ye divyāste brahmaṇo guṇāh;

Teṣhāmātmani sampattyai punarāh prajāpatih. 92

Dvā suparṇetisamproktam pratyagātmā’kṣharadvayam;

Ṛutapānashrutau hyevam muktā’’tmā’kṣharabrahmaṇī. 93

Tadeva yāgnavalkyoktau gārgīprashnottare sthitam;

Nikhila-loka-kālāderbrahmākṣharam prashāsakam. 94

Chetana-prakṛuterdeho muktasyokto vacho’mṛute;

Sarvachetayitṛutvam cha brahmā’tah prakṛutih parā. 95

Divyadhāmarūpamakṣharam brahma

Brahmeshah sahajānandah swayam brahmā’kṣharam tathā;

Muktāshcha yatra tiṣhṭhanti hyakṣharadhām kīrtitam. 96

Kālātītam guṇātītam prakāshavadamāyikam;

Brahmabhūtaikalabhyam tad anupamamanuttamam. 97

Loko dhām param vyom sadma cha nilayah padam;

Shabdaistu vividhaih proktamakṣharam brahma vishrutaih. 98

Videha-muktya-vasthāyām-archirādipathena tat;

Labhante bhaktimantashcha tad dhāmā’nugrahāddhareh. 99

Aṣhṭame padadhāmabhyām panchadashe tathaiva cha;

Sthāna-visheṣhamevoktam upakramādilingatah. 100

Proktam yanmam dhāmeti viṣhṇostatparamam padam;

Sasmādanena vākyena shrutyartha upabṛumhitah. 101

Manuṣhyākāratastaddhi sākṛutikam bhavet sadā;

Tasya chaturṣhu pārshveṣhu naikabrahmāṇḍasamsthitih. 102

Videhamuktyavasthā tu jnyānasthitirna kevalā;

Bhavedupasthitirdhāmni muktātmano dhruvam tadā. 103

Sarvagnam sachchidānandam niṣhpāpamiti chetanam;

Jaḍe na jnyānapāpādi tasmānnā’chetanam padam. 104

Nāstyaparah paro loko hyasmāddhyakṣharadhāmatah;

Yato virājate nityam atra parā’kṣharāt parah. 105

Sakaleṣhvapi vedeṣhu yatibhir-ṛuṣhibhistathā;

Charyām brahmaṇi vānchhadbhirakṣharadhām kīrtitam. 106

Dhāmastha-sevaka-rūpamakṣharam brahma

Sahajānanda-sevāyām dhāmni yad rājate sadā;

Sākṛuti chetanam hyekam sarvānga-divya-vigraham. 107

Īshe’sau puruṣhah proktamatraitaditi muṇḍake;

Parama-vyoma-shabdena taittirīye prakīrtitam. 108

Sisṛukṣhuh sahajānandah prathamatastadīkṣhate;

Tadapi mukta-vṛundam cha hyevam tat sṛuṣhṭi-kāraṇam. 109

Gururūpamakṣharam brahma

Chidākāshamamūrtatvāt sūkṣhmatvātprāpnuyāt katham;

Dhāmā’pi tamasah pāram sudūram sulabham na hi. 110

Dhāmni sevakarūpam yat tadapīh sudurlabham;

Ato manuṣhyarūpeṇa sulabhamakṣharam nṛuṇām. 111

Sukaro yen tatsangah sādhāraṇairjanairapi;

Sāralyam brahmaṇo mārga ānando darshanādike. 112

Nashyati sarvato duhkham sansārashcha nivartate;

Prāptirhi parameshasya sarvam sukham sukham sadā. 113

Gururakṣharabrahmaiva divyo divyatanordharah;

Nārāyaṇaswarūpam cha sampradāyā’bhirakṣhakah. 114

Paramātmā tu tatraiva samyak sadā virājate;

Swaprākaṭyā’nubhūtyartham nṛuṇām bhaktā’nukampayā. 115

Yathā brahmagurau vāsah Swāminārāyaṇa-prabhoh;

Naivā’nyatra tathā kvāpi pātrāṇām tāratamyatah. 116

Nārāyaṇaswarūpatvād dhyeyo brahmā’kṣharam guruh;

Nityamāste yatastasmin samyannārāyaṇo harih. 117

Brahmā’vataraṇam no ched ejanaprāṇanādikam;

Shrutyuktam vyarthatām gachchhed vyarthā syād varaṇīyatā. 118

Brāhmī sthitishcha gītoktā na sidhyed mohamardinī;

Viṣhādatādavasthyam syāllupyet prasannatākathā. 119

 Brahma mānavarūpeṇa jāyata iti budhyate;

 Ādarsham tanmumukṣhūṇām jīvanavartanādiṣhu. 120

 Janma karma sadā divyam akṣharādhipateryathā;

 Tathaiva tu vijānīyād brahmā’kṣharaguroriha. 121

 Prayojanam nimittādi rītishcha kālanirṇayah;

 Sahajānanda-vajjnyeyam nityamāyeshabrahmaṇah. 122

Prasthāna-chatuṣhṭaye’kṣharabrahma-ghoṣhah

Vedānte vyāsasūtre cha gītāyām vachanāmṛute;

Prasthāneṣhu chaturṣhvoto brahmaghoṣh ihochyate. 123

Vachanāmṛute’kṣharabrahma-ghoṣhah

Tyaktvā dehādibhāvānshcha kṛutvā’’tmabrahmabhāvanām;

Kāryā sākṣhāddharerbhaktistadraho vachanāmṛute. 124

Tasmāddhi svopadesheṣhu tadrahasyā’nusāratah;

Akṣharam ghoṣhitam bhūri sankṣhepādiha darshyate. 125

Vyāpakam sachchidānandam chidākāsham cha sevakam;

Prakṛutipuruṣhotkṛuṣhṭam nirvikalpa-samādhigam. 126

Sṛuṣhṭyartham prathamām dṛuṣhṭim paramātmakṛutām dharat;

Chidākāshatayā proktam sarveṣhām kāraṇam tathā. 127

Na vikāso na sankocho nityam yasyaikarūpatā;

Sadaiva dhāmarūpeṇa mūrtimachcha mahattamam. 128

Yatsahitam param brahma pṛuthivyām hi virājate;

Gaḍhaḍā-prathamoktau syādevam brahmanirūpaṇam. 129

Prerakam sūrya-chandrādermāyikopādhivarjitam;

Sārangapura-vākyeṣhu brahmoktam jnyāni-lakṣhaṇe. 130

Yatra sanneva sarvatra harirvyāpnoti sarjane;

Kāriyāṇyām brahma gītam layabhūh prakṛuteh param. 131

Bhaktyadhikāritāghoṣhe hyuttame nirvikalpake;

Nishchaye brahma samproktam loyāgrāma-vacho’mṛute. 132

Yachcha bhagavato dhāma golokādiparam sadā;

Atyadhikam sukham yasya harimāhātmyavarṇane. 133

Sadā sākṛutayo yatra harirbhaktā harestathā;

Pralaye’pi virājante panchāḷāyām prakīrtitam. 134

Brahmajnyānopadeshe cha jnyānayagna-nirūpaṇe;

Lakṣhya-darshana-vārtāyām sānkhya-yogagna-bodhane. 135

Hema-strī-bandhanāshoktāv-ātmaniṣhṭhā-prakāshane;

Gaḍhaḍāmadhyavākyeṣhu brahmā’kṣharam prabodhitam. 136

Vāḍavāgnisamah siddhah paramaikāntikastathā;

Haririvaiva sevyo hi yatprītirdarshayet param. 137

Satpuruṣhastathā yatra viṣhayāṇām sukham bhavet;

Narakasyeva taddhāma varatāloktidarshitam. 138

Vyākhyāyām shreṣhṭha-bhaktasya gītokta-jnyāni-lakṣhaṇe;

Amadāvāda-vākyeṣhu brahmabodhah prakāshyate. 139

Sarvārthasiddhyupāye hi dayāprītinirūpaṇe;

Shāstra-siddhāntasāre cha panchabheda-prabodhane. 140

Bhagavat-tulya-sevyam cha yatra sato’nvayo hareh;

Brahma paraniyamyam yad gaḍhaḍā’ntyokti-bodhitam. 141

Bhagavannishchayoktiṣhu hyasādhāraṇa-lakṣhaṇe;

Prajāpatyādi-doṣhoktāvavashiṣhṭe vacho’mṛute. 142

Prakaraṇeṣhvanusyūtam sarvatra vachanāmṛute;

Sasmār sahajānanda ittham brahmā’kṣharam muhuh. 143

Upaniṣhatsvakṣharabrahmaghoṣhah

Akṣharam vividhai rūpaih swabhāvaishcha guṇādibhih;

Yathopaniṣhadi proktam tathochyate pradhānatah. 144

Ejanam naijanam hīshe dūram yachchā’ntike sadā;

Paryāyo brahmalokasya kene swargah prayojitah. 145

Sarvairāmananam vedairālambanam param tathā;

Setuh padam param viṣhṇorvyaktamavyaktasangnayā. 146

Sūryachandrādyabhāsitvam sarveṣhām bhāsanam yatah;

Evam brahmaprakāsho’yam kaṭhe kaṇṭharavāyitah. 147

Virajo brahmalokādi paramamakṣharam sfuṭam;

Ohmkārabodhitam brahma prashne jīvaghanāt param. 148

parayā’dhigamo yasya gururūpā’kṣharam sadā;

Ejatprāṇaditi shrutvā manuṣhyākāra-nishchayah. 149

Dhanurlakṣhyāmṛutam setuh sūryādyabhāsi pūrvavat;

Purah pashchādadh ūrdhvam chidākāshasya varṇanam. 150

Brahmadhām param shubhram nāmarūpavimuktabhūh;

Muṇḍakam maṇḍitam pūrṇamakṣharabrahma-gunjanaih. 151

Ohmmiti kīrtitam divyamakṣharam sarvakāraṇam;

Bhūtam bhavachcha bhavyam cha sarvam yadātmakam sadā. 152

Tryavasthītaraṇāyaiva brahmaikyabharaṇāya cha;

Parātmani praveshāya māṇḍūkye brahmachintanam. 153

Brahmavidah paraprāptih satya-jnyānādi-lakṣhaṇam;

Vipashchiddhāmni sevāstham taittirīye cha ghoṣhitam. 154

Aitareyasya mantreṣhu brahmaṇah sthānarūpatā;

Sapragnamuktadhāmatvam swargādi-shabdavarṇitam. 155

Ohmkārā’kṣharamudgītham brahmadhāmā’bhayā’mṛutam;

Brahma gamayatītyuktam pathā’rchirādinā bhṛusham. 156

Sachchhabda-vāchyatā ṣhaṣhṭhe tachchhabda-vāchyatā punah;

Saptame bhūmavidyāyām brahma-dṛuṣhṭishcha gīyate. 157

Ākāsho daharo’ntahstho yadantah puruṣhottamah;

Satyam brahmapuram yasmin kāmāh sarve samāhitāh. 158

Kṛutā’’tmanā’bhisampādyah punarāvartanam nahi;

Brahmaloko hi chhāndogye chhandobhirvinirūpitah. 159

Prajāpatyādilokā ya otāh protāshcha dhāmani;

Ānando brahmalokasya sarvalokā’tigah parah. 160

Ihaiva brahmabhāvā’’ptiratra brahma samashnute;

Swarga-shabdena vāchyatvam hṛudayā’’kāshatā punah. 161

Vipāpo virajah samrāḍ brahmalokah sukīrtitah;

Bṛuhadāraṇyakam brūte bṛuhad brahmaprashāsanam. 162

Brahmoḍupopamam proktam parama-vyoma-samjnyitam;

Sūrya-chandrādyabhāsitvam kaṭhamuṇḍakavatpunah. 163

Yathā deve parā bhaktirgurau pratyakṣha-brahmaṇi;

Prakāshah sakalārthānām shvetāshvataradarshitah. 164

Sarvāsūpaniṣhatsvittham akṣharam brahma kīrtitam;

Grathitam tatsamāsena bhāṣhye tadvistarah sthitah. 165

Evamāpātato brahmayogah pradarshito mudā;

Gūḍhamāloḍane’vashyam āshcharyam bahudarshanāt. 166

Gītāyāmakṣharabrahmaghoṣhah

Prathame brahmabhāvasya shūnyatve’rjunamūḍhatā;

Atah samagragītāyām brahmabhāvopadeshanam. 167

Dvitīye hi samādhistha-sthitapragna-nirūpaṇe;

Adhyātmachetasetyādi tṛutīyādhyāya-kīrtitam. 168

Jnyānashabdā’bhidheyam tad brahmā’rpaṇādi-bodhitam;

Praṇipātādisevyam cha tattvadarshīti kīrtitam. 169

Brahmaṇi nityaprākaṭyam upadekṣhyanti-bodhanāt;

Akṣharabrahmayogo’yam chaturthe prāpyate bhṛusham. 170

Sarvabhūtā’’tmabhūtā’’tmā brahmavid brahmayogayuk;

Brahma-nirvāṇa-mityādipadeṣhu panchame tathā. 171

Brahmasansparshamityādi yogafala-nirūpaṇe;

Ṣhaṣhṭhe sugaditam spaṣhṭam yogilakṣhaṇa-kīrtane. 172

Para-prakṛutirūpatvam tathā praṇavavāchyatā;

Saptame brahma-shabdena jnyāninirūpaṇe punah. 173

Anvarthe vedavidvāṇī-gocharībhūtamaṣhṭame;

Akṣharam bhāti suvyaktam ohm avyaktādibhih punah. 174

Navame jnyāna-yajnyena rājavidyā-prabodhane;

Paramaprāptyupāye’pi dashame buddhi-yogatah. 175

Ātmabhāvastha-shabdena prākaṭyamapi kīrtitam;

Ekādashe’kṣharam proktam vishvaswarūpa-darshane. 176

Paropāsanamātrasya shreṣhṭhatva-sthāpanāya cha;

Avyakta-mahimā prokto dvādashe bhakta-lakṣhaṇam. 177

Anādi matparetyādi-lakṣhaṇair-lakṣhitasya cha;

Trayodashe kṛutam klṛuptam chidākāshasya rūpaṇam. 178

Sādharmye parameshasya jnyānopāshrayapūrvake;

Guṇātīta-niruktau cha brahmasmṛutish-chaturdashe. 179

Parito mārgaṇīyatvam nirmāna-moha-labhyatā;

Abhāsamānatā’rkādyairyadanāvṛuttishīlatā. 180

Dhāmno bhagavatah proktā spaṣhṭam panchadashe sthitih;

Kṣharā’tītā’kṣharam brahma hyante kūṭasthatā punah. 181

Kāmakrodhādimuktaistu prāpyabhūtā parā gatih;

Ṣhoḍashe mokṣharūpoktā yā’labhyā swairavartibhih. 182

Ohm tatsaditi shabdaishcha brahmaṇah paramātmavad;

Vyapadesha ohmkāreṇa saptadashe pradarshitah. 183

Brahmā’’ptih siddhiyuktāya brahmabhūyastvasanyutā;

Bhajane brahmabhūtatvam-anivāryam prakīrtitam. 184

Sarvā’dhyāyopasanhāro hyaṣhṭā’dhike dashe punah;

Brahmabhāve kṛutastasmād brahmabhāvā’’graho bhṛusham. 185

Brahmā’kṣharamanusyūtam uktam sangraharūpatah;

Sangatirvistaro yuktistadbhāṣhye paridṛushyatām. 186

Brahmasūtre’kṣharabrahma-ghoṣhah

Jijnyāsyam kāraṇam shāstrād vidyate yatsamanvayah;

Pareṇa saha brahmoktish-chatuhsūtryām prakāshate. 187

Sachchhabda-vāchyatāsiddhira-shabda-khaṇḍane punah;

Sarvagatatvamīshe yat tat sarvatreti sādhitam. 188

Guhāmityādinā chaiva sukhartapānakartṛutā;

Adṛushyatvādibhirlingair-akṣharapratipādanam. 189

Dyubhvādīti punashchaiva muṇḍakoktisamanvayah;

Bhūmā’dhikaraṇe gūḍham akṣhare dahare sfuṭam. 190

Lingairarthā’ntaratvādyairnirvoḍhṛutvam prakīrtitam;

Ākāsha-padavāchyasya brahmaṇah pratipāditam. 191

Avyakta-shabda-vāchyatvam ānumānika-khaṇḍane;

Ākāsha-kāraṇatvam cha nirbīja-sānkhya-khaṇḍane. 192

Brahmadvayātmakatvasya prakṛutau tu prasādhane;

Anavakāshadoṣhā’’khya-prasangā’’pattivāraṇe. 193

Kārya-kāraṇa-bhāvasya vailakṣhaṇye’pi bodhane;

Bhoktrā’’pattinirāse cha kāryā’nanyatva-sādhane. 194

Adhikamiti bhedasya nirdesho’sti swarūpatah;

Kṣhīravaddhīti siddhā syāt kāraṇasya visheṣhatā. 195

Kṛutsnaprasaktirūpāṇām doṣhāṇām vāraṇam bhavet;

Shrutestu shabdamūlatvādityādyasūtrayanmunih. 196

Sarvakaraṇa-yuktatvam sarvopeteti sādhitam;

Pratijnyā’hānirityādau tejo’dhikaraṇe tathā. 197

Paratantrā’dhikāre cha parāttu tachchhruteriti;

Trivṛutkurvata ityādau kāraṇatva-prasādhane. 198

Suṣhupteshcha prabodhasya satsampatteh prabodhane;

Pūrvavadveti sansarga-bodhe’kṣhara-parātmanoh. 199

Paramātma-paratvoktau parādhi-karaṇe punah;

Sakalairapi vedāntaih pratyayasya prasādhane. 200

Ānandādyupasanhāre hyātmagṛuhītibodhane;

Sambandhasya visheṣhatve vidyāyām puruṣhasya cha. 201

Sāmparāyā’dhikāre cha gatiniyamavarṇane;

Akṣharadhyadhikāre tad antarā’dhikṛutau tathā. 202

Vyatihāre vidhātavye nirdhārā’bhāvabodhane;

Tadbhāvabhāvitoktau cha prativedam cha sansmṛutau. 203

Puruṣhārthā’dhikāre’pi tathā’dhikopadeshatah;

Aihikādhikṛutau muktau muktifalaprabodhane. 204

Āvṛutterasakṛudbodhe tathā’’tmetīti chintane;

Brahmadṛuṣhṭividhau chaiva parasampatti-sādhane. 205

Tadoko’greti sūtreṇa bhaktotkrānter-nirūpaṇe;

Archirāditayā shāstre prathitāyā gatestathā. 206

Muktaishvaryaguṇādeshcha vigrahādeh prakāshane;

Prasange muktabhogānām anāvṛuttiprasādhane. 207

Jijnyāsāsūtramārabhya brahmavidyānirūpake;

Sakale sūtrashāstre tu brahmaghoṣho muhurmuhuh. 208

Idam sankṣhipya sanproktam sūtrashailyā mitā’kṣharaih;

Vistaro’sya tu tadbhāṣhyād adhigamyo budhairmudā. 209

Tādṛugupaniṣhannāsti gītā’dhyāyo na vidyate;

Adhyāyo brahmasūtre cha prakaraṇam vacho’mṛute. 210

Brahmā’kṣharasya divyasya yaddhi yogam vinā bhavet;

Brahmā’tah sansmarennityam brahmabhāvāya bhaktaye. 211

Pāṇḍitye khalu paryāptah kaṇṭhapāṭho’pi kevalah;

Vibhāti sangrahe samyak sākṣhād brahmā’kṣharam yatah. 212