સ્નેહગીતા
પદ ૮
રાગ ગોડી (‘પ્રાણ મ રે’જો પ્રીતમ વિના’ એ ઢાળ)
શ્રીનાથ સાથે મન માનિયું, ઉદ્ધવ એ વિના અમે ન રહેવાયે હો ।
વાલાને વિયોગે વીતે પળ વળી, તેતો જુગ તુલ્ય જાયે હો... શ્રીનાથ꠶ ॥૧॥
સુતાં બેઠાં સાંભરે છે સલુણો, સુખકારી શ્યામ સદાયે હો ।
ખાતાં પીતાં ખટકે હૃદયે, અલબેલો અંતરમાંયે હો... શ્રીનાથ꠶ ॥૨॥
દર્શન વિના જે દલડું દાઝે છે, તે તો કેને ન કહેવાયે હો ।
અવર કોયે ઓષડ ઉસતાદે,1 શરીર સુખ નવ થાયે હો... શ્રીનાથ꠶ ॥૩॥
પ્રેમના પાશમાં પાડી ઉદ્ધવ અમને, ઘેરીને માર્યું છે ઘાયે હો ।
નિષ્કુળાનંદના નાથે નથી રાખ્યો, ઊગરવાનો ઊપાયે હો... શ્રીનાથ꠶ ॥૪॥ પદ ॥૮॥