ભક્તિનિધિ
કડવું - ૬
રાગ: ધન્યાશ્રી
પ્રસન્ન કરવા ઘણું ઘનશ્યામજી, કરો હરિભક્તિ અતિ હૈયે કરી હામજી ।
જે ભક્તિ અતિ કા’વે નિષ્કામજી, ધર્મસહિત છે સુખનું ધામજી ॥૧॥
રાગ: ઢાળ
ધામ સર્વે સુધર્મ સોતી, ભક્તિ અતિ ભક્ત કરે ।
તેને તોલે ત્રિલોક માંહિ, સમજી જુવો નહિ નીસરે ॥૨॥
જેણે આ લોક સુખની આશા મેલી, પરલોક સુખ પણ પરહર્યાં ।
એક ભક્તિ ભાવી ભગવાનની, વિષયસુખ વિષ સમ કર્યાં ॥૩॥
જેણે પંચ વિષયશું પ્રીત ત્રોડી, જોડી પ્રીત ભક્તિ કરવા ।
તજી મમત તન મનની, તેને રહી કહો કેની પરવા1 ॥૪॥
રાજી કુરાજીયે કોઈને, નવ વણસે2 સુધરે વાત ।
નથી એથી સુખ મળવા ટળવા, જોઈએ હરિ રાજી રળિયાત ॥૫॥
પરબ્રહ્મને પ્રસન્ન કરવા, કરે ભક્તિ માહાત્મ્યે સહિત ।
ધરી દૃઢ ટેક એક અંતરે, તે ફરે નહિ કોઈ રીત ॥૬॥
નિષ્કપટ નાથની ભગતિ, સમજો સુખ ભંડાર છે ।
એની બરાબરી નોય કોઈ બીજું, એ તો સર્વે સારનું સાર છે ॥૭॥
સાચી ભક્તિ ભગવાનની, સર્વે શિર પર મોડ3 છે ।
બીજાં સાધન બહુ કરે, પણ જુવો એની કોઈ જોડ છે ॥૮॥
જેમ ગળપણમાં શર્કરા4 ગળી, વળી રસમાં સરસ તૂપ ।
જેમ અંબરે સરસ જરકસી, તેમ ભક્તિ અતિ અનુપ ॥૯॥
એવી અનુપમ ભગતિ, ભાવી ગઈ જેને ભીતરે ।
નિષ્કુળાનંદ કે’ સર્વે સાધન, એની સમતા કોણ કરે ॥૧૦॥