ભક્તિનિધિ

પદ – ૪

રાગ: આશાવરી

સંતો સમે સેવી લિયો સ્વામી રે સંતો સમે સેવી લિયો સ્વામી.

  જેને ભજતાં રહે નહિ ખામી રે... સંતો૦ ટેક.

મટે ખોટ્ય મોટી માથેથી, કોટિક ટળીયે કામી;

પૂરણ બ્રહ્મ પ્રભુ મળે પોતે, ધામ અનંતના ધામી રે. સંતો૦ ॥૧॥

જે પ્રભુ અગમ1 નિગમે2 કહ્યા, રહ્યા આગે કરભામી;3

તે પ્રભુ આજ પ્રગટ થયા છે, જે સર્વે નામના નામી રે. સંતો૦ ॥૨॥

અણુ એક એથી નથી અજાણ્યું, જાણો એ છે અંતરજામી;

તેને તજીને જે ભજે બીજાને, તે તો કે’વાયે લૂણહરામી4 રે. સંતો૦ ॥૩॥

જેનાં દર્શ સ્પર્શ કરે પ્રાણી, તેનાં પાપ જાયે વામી;5

નિષ્કુળાનંદ કે’ આનંદ ઊપજે, પૂરણ પુરુષોત્તમ પામી રે. સંતો૦ ॥૪॥

 

કડવું – ૧૭

રાગ: ધન્યાશ્રી

પૂરણ પુરુષોત્તમ પામિયે જ્યારેજી, તન મનમાંહિ તપાસિયે ત્યારેજી ।

આવો અવસર ન આવે ક્યારેજી, એમ વિચારવું વારમવારેજી ॥૧॥

રાગ: ઢાળ

વારમવાર વિચારવું, વણસવા6 ન દેવી વળી વાત ।

સમો જોઈને સેવકને, હરિ કરવા રાજી રળિયાત ॥૨॥

અવળાઈને7 અળગી કરી, સદા સવળું વર્તવું સંત ।

અવળાઈયે દુઃખ ઊપજે, વળી રાજી ન થાય ભગવંત ॥૩॥

જેમ ભૂપના ભૃત્ય8 ભેળા થઈ, સમા વિના કરે સેવકાઈ ।

જોઈ એવા જાલમ9 જનને, રાજા રાજી ન થાયે કાંઈ ॥૪॥

જ્યા જોઈએ ભલુ ભાગવું, ત્યાં સામો થાય શૂરવીર ।

જ્યાં જોઈએ થાવું ઉતાવળું, ત્યાં ધરી રહે ધીર ॥૫॥

જ્યાં જોઈએ હારવું, ત્યાં કરે હઠાડવા10 હોડ ।

જ્યાં જોઈએ નમવું, ત્યાં કરે નમાડવા કોડ ॥૬॥

જ્યાં જોઈએ જાગવું, ત્યાં સૂવે સોડ11 તાણીને ।

જ્યાં જોઈએ બોલવું, ત્યાં બંધ કરે છે વાણીને ॥૭॥

જ્યાં ન જોઈએ બોલવું, ત્યાં બોલે છે થઈ બેવકૂફ12

જ્યાં જોઈએ વસવું, ત્યાંથી ખસી જાય છે ખૂબ ॥૮॥

એવી ભક્તિ જો આવડી, જેમાં રાજી ન થાય રામ ।

કરવાનું તે કરે નહિ, કરે ન કરવાનું કામ ॥૯॥

એવા સેવકને શ્રીહરિ, પાસળથી13 પરા14 કરે ।

નિષ્કુળાનંદ એ નરને, સેવતાં સુખ શું આવ્યું સરે15 ॥૧૦॥

કડવું 🏠 home